1 תפלה לדוד שמעה יהוה צדק הקשיבה רנתי האזינה תפלתי בלא שפתי מרמה׃

2 מלפניך משפטי יצא עיניך תחזינה מישרים׃

3 בחנת לבי פקדת לילה צרפתני בל־תמצא זמתי בל־יעבר־פי׃

4 לפעלות אדם בדבר שפתיך אני שמרתי ארחות פריץ׃

5 תמך אשרי במעגלותיך בל־נמוטו* פעמי׃

6 אני־קראתיך כי־תענני אל הט־אזנך לי שמע אמרתי׃

7 הפלה חסדיך מושיע חוסים ממתקוממים בימינך׃

8 שמרני כאישון בת־עין בצל כנפיך תסתירני׃

9 מפני רשעים זו שדוני איבי בנפש יקיפו עלי׃

10 חלבמו סגרו פימו דברו בגאות׃

11 אשרינו עתה [כ= סבבוני] [ק= סבבונו] עיניהם ישיתו לנטות בארץ׃

12 דמינו כאריה יכסוף לטרוף וככפיר ישב במסתרים׃

13 קומה יהוה קדמה פניו הכריעהו פלטה נפשי מרשע חרבך׃

14 ממתים ידך יהוה ממתים מחלד חלקם בחיים [כ= וצפינך] [ק= וצפונך] תמלא בטנם ישבעו בנים והניחו יתרם לעולליהם׃

15 אני בצדק אחזה פניך אשבעה בהקיץ תמונתך׃